Dómkirkjan

Á morgun 24. september í Neskirkju
„Munið hvað hann sagði ykkur.“ Biblían: Texti og túlkun. Kristin trú byggir á ritningum.

HVAÐ ER KRISTIN TRÚ?
UM KRISTNA TRÚ Í SÖGU OG SAMTÍÐ
Hvernig varð kristin trú til? Hver er Jesús, þessi sögulega persóna sem allt hverfist um og var tekinn af lífi í Jerúsalem? Hvernig stóð á því að hann varð Kristur í trúarjátningum kristninnar? Hvernig þróaðist kristin trú þegar horft er til trúarlegra athafna, skipulags og helgihalds? Hvernig var sambandi háttað við önnur samfélög á þeim slóðum þar sem kristin trú breiddist út? Hvernig birtist kristin trú á vorum dögum og hvað einkennir hana? Hvernig á kristin trú að vera?
Dómkirkjan og Neskirkja halda námskeið í haust þar sem reynt verður að svara spurningunni „Hvað er kristin trú?“. Kennt verður sjö fimmtudagskvöld frá kl. 18-20. Námskeiðið hefst 17. september og stendur út október. Einnig verður kennt einn laugardag frá kl. 10-14.Til hliðsjónar á námskeiðinu verður notuð bókin Hvað er kristin trú? Um kristna trú í sögu og samtíð, eftir Halvor Moxnes, prófessor við háskólann í Ósló. Moxnes er einn fremsti fræðimaður á svið biblíufræða á Norðurlöndum. Hvert kvöld byrjar með sameiginlegri máltíð.

Opna húsið haustið 2015

Dómkirkjan býður alla velkomna á Opna húsið í Safnaðarheimilinu, Lækjargötu 14a, á fimmtudögum, kl.13:30-15:30. Góðir gestir koma í heimsókn, boðið er upp á kaffi og með því, að ógleymdri skemmtilegri og nærandi samveru.
Sjáumst fimmtudaginn 17. september
17. september Vinafundur, kaffi og samvera.
24. september Haustferð, farið verður í Strandakirkju.
1. október Páll Bergþórsson
8. október Eyrún Ingadóttir
15. október Bingó
22. október Anna Sigríður Pálsdóttir
29. október Helga Guðrún Johnson
5. nóvember Karl Sigurbjörnsson
12. nóvember Páll Benediktsson
19. nóvember Guðrún Ágústsdóttir
26. nóvember Hrafnhildur Schram
3. desember Aðventusamvera

Á fimmtudaginn verður farið í haustferð Dómkirkjunnar, leggjum af stað frá Umferðarmiðstöðinni kl. 13. Ferðinni er heitið í Strandarkirkju og síðan í kaffihlaðborð í T- bæ.
Fararstjóri verður Karl Sigurbjörnsson, biskup.
Skráning og nánari upplýsingar hjá Laufeyju í síma 898-9703. Skráningu lýkur á morgun,miðvikudag.
Hér koma nokkrar myndir frá fyrri ferðum.

Í hádeginu í dag er kyrrðar og bænastund í Dómkirkjunni. Hún hefst með orgelleik kl. tólf og lýkur um hálf eitt. Að henn lokinni er léttur hádegisverður í safnaðarheimilinu við Lækjargötu. Fyrirbænarefnum má koma til prestanna eða kirkjuvarðar. Mörgum finnst dýrmætt að verja hádegishléinu á þennan hátt, til íhugunar og endurnæringar á líkama og sál. Guð heyrir hverja bæn, sér og skilur allt, því hann hefur verið þar sem þú ert og þekkir tárin þín, áhyggjur, vonbrigði og efa, og kærleika þinn, von og gleði. Veik trú er líka trú, sem Guð blessar.

Hátíðleg stund í Dómkirkjunni í gær, en þá vígði Kristján Valur Ingólfsson vígslubiskup í Skálholti djáknakandídat og tvo guðfræðikandídata.

Hrafnhildur Eyþórsdóttir var vígð djáknavígslu til þjónustu í Laugarnessókn, Hátúni 10 og 12, í Reykjavíkurprófastsdæmi vestra.

Cand. theol. Eva Björk Valdimarsdóttir var vígð prestsvígslu til þjónustu í Keflavíkursókn í Kjalarnessprófastsdæmi.

Mag. theol. Jóhanna Gísladóttir var vígð prestsvígslu til þjónustu í Langholtssókn í Reykjavíkurprófastsdæmi vestra.

Vígsluvottar: Ásta Ágústsdóttir, djákni í Kópavogskirkju, sr. Erla Guðmundsdóttir, sóknarprestur í Keflavíkurprestakalli, sr. Guðbjörg Jóhannesdóttir, sóknarprestur í Langholtsprestakalli, sr. Helga Soffía Konráðsdóttir, prófastur í Reykjavíkurprófastsdæmi vestra, sem lýsir vígslu, sr. Kristín Þórunn Tómasdóttir, sóknarprestur í Laugarnesprestakalli, sr. Oddur Bjarni Þorkelsson, prestur í Dalvíkurprestakalli. Séra Hjálmar Jónsson, sóknarprestur Dómkirkjunnar, þjónaði fyrir altari.