Dómkirkjan

Messa og skemmtilegur sunnudagaskóli á kirkjuloftinu sunnudaginn 29. september kl.11.00. Prestur séra Sveinn Valgeirsson, organisti Kári Þormar og Dómkórinn. Hlökkum til að sjá ykkur!

Laufey Böðvarsdóttir, 25/9 2019

Fimmtudagstónleikar í Dómkirkjunni frá klukkan 18 – 18.30 í allan vetur. Þar skiptast á Kári Þormar, dómorganisti og Kammerkór Dómkirkjunnar, Á tónleikunum flytur Kammerkór Dómkirkjunnar verk eftir Þorkel Sigurbjörnsson, Önnu Þorvaldsdóttur, William Byrd , Ola Gjeilo og fleiri Aðgangseyrir er krónur 1500

Laufey Böðvarsdóttir, 25/9 2019

Fólkið í kirkjunni: Leikmaður í biskupshúsi Marinó Þorsteinsson, traustur maður við traustan stofn. Hann hefur setið 29 leikmannastefnur og lét nýverið af formennsku í leikmannaráði þjóðkirkjunnar. Nú er hann formaður sóknarnefndar Dómkirkjunnar og hefur verið þar í sóknarnefnd frá 1985 eða í 35 ár. Þar af formaður í fjórtán ár. „Ég ólst upp á trúuðu heimili,“ segir hann, „barnatrúin fylgdi mér úr foreldrahúsum og hefur ætíð hjálpað mér og ekki síst á erfiðum stundum“. Marinó Sæberg Þorsteinsson er fæddur og uppalinn á Akureyri. Hann er einn af mörgum lærisveinum sr. Péturs Sigurgeirssonar, síðar biskups. Gekk í sunnudagaskólann hjá honum fyrir norðan og um fermingu tók hann þátt í öflugu æskulýðsstarfi prestsins unga og glaða sem heillaði alla með hlýju brosi og kærleiksríkri nærveru. Það mótaði unga drenginn sem síðan fór í Menntaskólann á Akureyri. „Ég er honum ævinlega þakklátur,“ segir Marinó með þungri áherslu þegar honum verður hugsað til sr. Péturs. Marinó hélt suður að stúdentsprófi loknu og hóf nám í viðskiptafræðum við Háskólann sem hann lauk 1964. Hann hélt út í lífið þar sem mörg verkefni biðu unga mannsins. Marinó enda lipur í samskiptum, glöggur og réttsýnn. Skjótur til verka enda hraðgengur og snar í snúningum eins og enn þennan fagra haustdag þegar kirkjan.is tók hús á honum. Framkvæmdastjórn og verkstjórn félaga og samtaka fórst honum vel úr hendi og hann var kallaður til ýmissa starfa þar sem vanda þurfti til allra verka. Hann starfaði í tvo áratugi hjá Smjörlíki/Sól hf., og í fimmtán ár hjá Innkaupastofnun Reykjavíkurborgar. Starfsferli sínum lauk hann hjá Orkuveitunni og var þar í sex ár. Marinó og kona hans, Anna Garðarsdóttir, búa við Vesturgötuna í Reykjavík. Húsið lætur lítið yfir sér og í raun nýtur það þeirra forréttinda að eftir því er ekki tekið. Stendur hljótt í götunni og öruggt á allar hliðar. Bak því er lítil paradís, stór og mikill garður. Og það hvarflar ekki að vegfarendum sem fara þar hjá í amstri daganna að slíkan sælureit sér þar að finna. „Þetta hús reisti biskupinn sr. Hallgrímur Sveinsson og bjó hér,“ segir Marinó. „Þá var það einlyft og með háu þaki. Það er búið að stækka það mikið og endurbæta.“ Viðirnir í húsið voru fluttir inn frá Noregi og þegar unnið var að endurbótum hússins og þil tekin ofan komu í ljós stoðir sem allar voru merktar vandlega með rómverskum tölustöfum hinna norsku framleiðenda sem áttu að tryggja að það yrði sett saman með réttum hætti. Sr. Hallgrímur biskup, hann muna fáir – var fæddur á fimmta áratug 19du aldar. Flestir biskupar gleymast eins og aðrir enda þótt merkir séu. En þó má nefna honum til heiðurs að hann þá dómkirkjuprestur knúði fram að kolaofnar voru settir í Dómkirkjuna þegar endurbætur voru gerðar á henni árið 1879. Þá tók að liðast svartur kolareykur upp um reykháfana tvo sem enn má sjá á kirkjunni. En kirkjumálin hafa átt hug sóknarnefndarformannsins Marinós um áratugaskeið og hann verið í forystu leikmanna. Þar hefur verið traustur maður í forsvari þeirrar hreyfingar sem hefur kannski ekki verið áberandi í kirkju landsins. En leikmenn eru þegar á öllu er botninn hvolft lykilfólk í kirkjunni. Marinó Þorsteinsson, formaður sóknarnefndar Dómkirkjunnar, er einn af þeim fjölmörgu sem stendur við bakið á kirkjunni sinni.

Laufey Böðvarsdóttir, 22/9 2019

Fyrsta prjónakvöld haustsins er mánudagskvöldið 23. september kl. 19:00. Nokkrar konur standa að prjónakvöldunum yfir vetrarmánuðina í safnaðarheimilinu. Þetta eru notalegar og skemmtilegar samverustundir, sem styrkja vináttubönd og samfélagið í söfnuðinum. Á þessi kvöld koma ungir sem aldnir. Konurnar selja létta máltíð, kaffi og sætmeti á vægu verði og gefa það sem safnast til fegrunar Dómkirkjunnar. Gestur okkar að þessu sinni verður Júlíana Þorvaldsdóttir, hún mun segja okkur frá prjónanámskeiði og frá Skals handavinnuskólanum sem hún er nýkomin úr. Júlíana er einnig ein dyggasta Hringskonan. Það verður gaman að sjá og heyra.

Laufey Böðvarsdóttir, 21/9 2019

Sunnudaginn 22. september kl. 11.00 messa og sunnudagaskóli Prestur séra Elínborg Sturludóttir, Kammerkór Dómkirkjunnar og organisti er Kári Þormar. Félagar í Dómkórnum skipa Kammerkór Dómkirkjunnar. Helsta hlutverk kórsins er söngur við útfarir frá kirkjunni. Einnig syngur kórinn við opinberar athafnir sem og ýmis hátíðleg tækifæri í tengslum við safnaðarstarfið. Velkomin!

Laufey Böðvarsdóttir, 21/9 2019

Óskum nývígðum prestum og djáknum Guðs blessunar í starfi og leik!

Laufey Böðvarsdóttir, 16/9 2019

Æðruleysismessa sunnudaginn 15. september kl.20.00

Æðruleysismessur voru settar af stað til þess að mæta vaxandi trúarþörf þeirra sem stunda 12 spora samtök. Þó eru þær opnar öllum :D Við komum sama til að eiga nærandi, eflandi, styrkjandi og róandi kyrrðarstund í nærveru ♥
Díana Ósk mun leiða stundina, Fritz Már mun flytja hugleiðingu, Sr. Sveinn mun leiða okkur í bæn, Þórður mun spila á píanó og stýra söng, Sigurjón mun flytja tónlist og góður félagi mun deila reynslu, styrk og von.
Andi tólf sporanna svífur yfir og saman munum við stíga inn í spor 1. að viðurkenna vanmátt okkar, spor 2. fara að trúa að máttur okkur æðri geri okkur heil að nýju, spor 3. leita vilja Guðs, spor 6. verða albúin að losna við brestina, spor 7. biðja Guð um að losa okkur undan brestunum, spor 10. rýna inn á við, spor 11. iðka bæn og hugleiðslu og spor 12. breiða út boðskapinn og hjálpa öðrum ♥
Endilega deilið viðburðinum, bjóðið fólki með ykkur og veitum sem flestum möguleika á að mæta ;)

Laufey Böðvarsdóttir, 14/9 2019

Laufey Böðvarsdóttir, 12/9 2019

Presta-og djáknavígsla á sunnudaginn kl. 11.00. Dómkórinn, organist Örn Magnússon. Biskup Íslands Agnes M. Sigurðardóttir, séra Sveinn Valgeirsson. Bílastæði gengt Þórshamri. Sunnudagaskóli á kirkjuloftinu. Verið velkomin!

Laufey Böðvarsdóttir, 12/9 2019