Dómkirkjan

Bæna- og kyrrðarstund í dag kl. 12:10-12:30. Séra Karl Sigurbjörnsson, biskup leiðir stundina og Kári Þormar leikur á orgelið. Rjómalöguð sveppasúpa að hætti Dagbjartar í safnaðarheimilinu að bænastund lokinni. Stundin er öllum opin og er góður vettvangur til samfélags og fyrirbæna. Fyrirbænir má senda á netfangið domkirkjan@domkirkjan.is eða í síma 520-9700.

 Hjartanlega velkomin.

Siðlausir söngvar í Langholtskirkju

Dómkórinn í Reykjavík og Kór Menntaskólans í Reykjavík halda tvenna tónleika í Langholtskirkju næstkomandi sunnudag, 16. mars, og hefjast þeir klukkan 17 og 20. Þar verður flutt tónverk Carls Orff, Carmina Burana, við ævafornan kveðskap úr Bæheimi sem hefur valdið hneykslan og hrollvekjandi hrifningu frá því hann varð til.

Alls taka yfir 100 manns þátt í flutningnum í kirkjunni. Með kórunum syngja einsöngvararnir Hallveig Rúnarsdóttir, sópran, Þorbjörn Rúnarsson, tenór, og Jón Svavar Jósefsson, bassabaritón. Einnig koma við sögu nokkrir drengir úr Skólakór Kársness. Vanalega er verkið flutt í hljómsveitarútsetningu en að þessu sinni er undirleikur í höndum tveggja píanóleikara, Helgu Bryndísar Magnúsdóttur og Kristins Arnar Kristinssonar, og sex manna slagverkssveitar. Stjórnandi á tónleikunum er Kári Þormar dómorganisti en hann er stjórnandi beggja kóranna.

Miðasala er í höndum félaga í báðum kórunum (kr. 3.000) og við innganginn (kr. 3.500).

Kirkjunefnd kvenna Dómkirkjunnar er með fund í dag kl. 17 í safnaðarheimilinu. Kirkjunefndin var stofnuð 1930 til að standa að prýði Dómkirkjunnar og vinna að líknarmálum. Það er ótrúlegt hvað þessi hópur hefur áorkað í gegnum tíðina en um leið sannað hvað er hægt með samvinnu, dugnaði og kærleika. Hér koma myndir sem teknar voru á 80 ára afmæli félagsins.

Frá Óla Jóni og Sigga Jóni:

Í kvöld verður Ungdóm-samveran með öðru sniði en venjulega. Við ætlum að horfa saman á bíómynd og gæti samveran því lengst í annan endan að fram til 21:30. Við erum með þrjár skemmtilegar bíómyndir (The Prince of Egypt/Despicable Me/Argo) í huga en þeir sem koma tímanlega fá að hjálpa okkur að velja myndina sem horft verður á. Boðið verður upp á popp og eitthvað svalandi að drekka með. Vonumst til að sjá sem flesta :)

Kær kveðja

Óli Jón og Siggi Jón

Messa kl. 11 fyrsta sunnudag í föstu. Séra Karl Sigurbjörnsson, biskup prédikar og þjónar fyrir altari.  Feðgarnir Björn Alexander Þorsteinsson og Þorsteinn Siglaugsson lesa ritningarlestrana, en Björn Alexander fermist nú í vor í Dómkirkjunni. Barnastarfið á kirkjuloftinu, börnin koma í kirkjuna og taka þátt í upphafi messu en fara síðan í fylgd fræðara upp á kirkjuloftið þar sem þau eiga sína samveru, sögur, söng og leiki. Tveir ungir menn, Ólafur Jón Magnússon og Sigurður Jón Sveinsson annast barnastarfið af mikilli prýði. Dómkórinn syngur undir stjórn Kára Þormar dómorganista.

Bingó á dag, fimmtudag sem Ástbjörn stjórnar. Dagbjört er með kræsingar með kaffinu, Hlökkum til að sjá ykkur.
Opna húsið er frá 13:30-15:30.

Í kvöld, mánudagskvöld ætlar Ungdóm hópurinn að fara í Laser-tag kl. 20 að Salavegi 2, Kópavogi. Herlegheitin fara fram á þar til gerðum velli í kjallara hússins (sama hús og Nettó, nálægt Lindakirkju) og er gegnið inn að norðanverðu. Öll börnin eru hvött til að mæta í fötum sem þægilegt er að hreyfa sig í. Spilaðir verða tveir leikir og kostar það allt í allt 1500 kr. á mann. Reiknað er með því að dagskrá verði lokið um kl. 21. Mikilvægt er að mæta tímanlega kl. 19:55! Mæting í Kópavog, sniðugt er að sameina í bíla.

Á morgun, þriðjudag  er bænastund í hádeginu sem séra Anna Sigríður leiðir og léttur hádegisverður í safnaðarheimilinu að henni lokinni.

Á fimmtudaginn er bingó í opna húsinu sem Ástbjörn okkar stjórnar og góðar kaffiveitingar.

Á sunnudaginn er messa þar sem séra Karl Sigurbjörnsson prédikar og þjónar fyrir altari. Séra Hjálmar kemur aftur til starfa um miðjan mánuðinn.

Sveinn Einarsson var með fróðlegan fyrirlestur um Guðmund Kamban leikskáld. Guðmundur var myrtur á frelsisdegi Dana 5. maí 1945. Sveinn gaf út bók um Kamban á síðsta ári og þessi fyrirlestur kveikti áhugann hjá viðstöddum að fræðast meira um líf og störf þessa merka manns.