Dómkirkjan

Aðventan setur mark sitt á götur og torg, ljós og hljómar aðventu og jóla hrífa unga sem aldna. Í Dómkirkjunni er boðið upp á guðsþjónustur, bænastundir og margvíslega viðburði, tónleika og samverur þar sem sálin fær næringu af boðskapnum um ljósið sem skín í myrkrinu og blessar líf og heim.

Jólatónleikar Dómkórsins verða mánudagskvöldið kl. 22:00. Stjórnandi er Kári Þormar, dómorganisti. Í huga margra eru jólatónleikar Dómkórsins í dimmasta skammdeginu ómissandi sem hluti aðventu og jólaundirbúningsins.
Sama er að segja um hina árlegu kertaljósatónleika „Mozart við kertaljós“ sem Camerarctica heldur. Þeir verða þriðjudagskvöldið, 22. desember kl. 21:00. Þykir mörgum ómissandi að koma úr miðri jólaösinni inn í kyrrðina og kertaljósin í rökkrinu og njóta ljúfrar tónlistar Mozarts.
Helgihald um jólin er með hefðbundnum hætti. Aftansöngurinn í Dómkirkjunni kl. 18 á aðfangadagskvöld lýkur upp hliðum hátíðarinnar fyir landsmönnum. Þá verður heilagt þegar klukknahljómurinn úr turni Dómkirkjunnar berst yfir landið á öldum ljósvakans. Að þessu sinni prédikar sr. Hjálmar Jonsson og sr. Sveinn Valgeirsson þjónar.
Á jólanótt klukkan hálf tólf er miðnæturguðsþjónusta. Kór Menntaskólans við Hamrahlíð syngur undir stjórn Þorgerðar Ingólfsdóttur. Karl Sigurbjörnsson, biskup, prédikar.
Á jóladag er hátíðarmessa kl. 11. frú Agnes M. Sigurðardóttir, biskup Íslands prédikar og séra Sveinn Valgeirsson þjónar.
Á annan jóladag er messa kl. 11. Karl Sigurbjörnsson, biskup prédikar
Sunnudaginn 27. desember kl. 11 séra Hjálmar Jónsson prédikar.
Gamlárskvöld er aftansöngur kl. 18 og messa á nýjársdag kl. 11, þar sem biskup Íslands prédikar. Séra Hjálmar og sr. Sveinn þjóna. Dómkórinn og organisti er Kári Þormar.
Sunnudaginn 3. janúar messar Karl biskup kl. 11.
Auk þessara athafna þá er dönsk jólamessa á aðfangadag kl. 15 séra María Ágústsdóttir prédikar og Bergþór Pálsson syngur.
Dómkirkjan óskar öllum blessaðrar aðventu og gleðilegrar jólahátíðar.

Kammerhópurinn Camerarctica heldur sína árlegu kertaljósatónleika í kirkjum nú rétt fyrir jólin. Hópurinn hefur leikið ljúfa tónlist eftir Mozart við kertaljós í tuttugu og þrjú ár og þykir mörgum ómissandi að koma úr miðri jólaösinni inn í kyrrðina og kertaljósin í rökkrinu. Mozart við kertaljós tónleikarnir verða í Dómkirkjunni þriðjudagskvöldið 22. desember kl. 21.00.
Hópinn skipa að þessu sinni þau Ármann Helgason, klarinettuleikari, Hildigunnur Halldórsdóttir fiðluleikari, Svava Bernharðsdóttir, víóluleikari og Sigurður Halldórsson, sellóleikari ásamt góðum gesti, Einari Jóhannessyni sem leikur á eitt af uppáhaldshljóðfærum Mozarts ” bassetthornið”.
Á efnisskránni í ár eru Kvintettar fyrir klarinettu, bassetthorn og strengi, Kv. 411 og Kv. 580 , Allegro úr Divertimento fyrir strengi Kv.563 og Kvartett fyrir klarinettu og strengi Kv.374. Að venju lýkur tónleikunum á því að Camerarctica leikur jólasálminn góða,” Í dag er glatt í döprum hjörtum”, sem er úr Töfraflautunni eftir Mozart.

Tónleikarnir eru klukkustundarlangir og hefjast þeir allir klukkan 21.00.
Aðgangseyrir er kr. 2500, og kr. 1500 fyrir nemendur og eldri borgara. Frítt er inn fyrir börn. Miðasala við innganginn.

Séra Sveinn Valgeirsson, Unnur Halldórsdóttir, djákni og Ragnheiður Sverrisdóttir djákni þjóna í Kolaportsmessu sunnudaginn 20. desember kl. 14. Margrét Scheving og Þorvaldur Halldórsson syngja og spila. Sjáumst í Kaffi porti.

Síðasta kyrrðar- og bænastundin á þessu ári er í hádeginu á morgun, þriðjudag. Bænastundin hefst með orgelleik kl.12.
Léttur hádegisverður í safnaðarheimilinu við Lækjargötu. Fyrirbænar­efnum má koma til prestanna eða kirkjuvarðar. Mörgum finnst dýrmætt að verja hádegishléinuá þennan hátt, til íhugunar og endurnæringar á líkama og sál.Guð heyrir hverja bæn, sér og skilur allt, því hann hefur verið þar sem þú ert og þekkir tárin þín, áhyggjur, vonbrigði og efa, og kærleika þinn, von og gleði. Veik trú er líka trú, sem Guð blessar.

Jólatónleikar í Dómkirkjunni
Sunnudaginn 13. des kl 16.00
Hólmfríður Jóhannesdóttir mezzósópran
Kristín Ragnhildur Sigurðardóttir sópran og
Julian Michael Hewlet píanóleikari
Dagskrá verður fjölbreytt að þessu sinni þar sem Hólmfríður og Kristín munu syngja austurríska, íslenska og ameríska jóladúetta.
Íslensk einsöngslög munu einnig hljóma ásamt negrasálmum frá Vestur Indíum.
Kristín, Hólmfríður og Julian störfuðu saman undir nafninu Ópera Gala og héldu um 20 tónleika víðsvegar um landið árin 2010 og 2011.
Nú 4 árum síðar liggja leiðir þeirra saman á ný á þessum jólatónleikum í dómkrikjunni.
Miðaverð er 2000 kr og er miðasala við innganginn án posa. Frítt fyrir börn.

Sophie Schoonjans leikur á hörpu.