Dómkirkjan

Á morgun sunnudag verður síðasta samvera Ungdóm í vor. Við ætlum að hittast í safnaðarheimilinu Lækjargötu 14a kl. 13 og skunda saman útí Hljómskálagarð, fara þar í leiki, t.d. ultimate frisbee og kubb. Dagskrá lýkur um 14:30. Það er spáð góðu veðri og stefnir í mikið stuð. Við vonumst til að sjá sem flesta unglinga.
Ungdóm-samverurnar hefjast aftur í september og við vonumst til að sjá sem flesta unglinga halda áfram að mæta í Ungdóm næsta haust, við munum að minnsta kosti halda áfram að halda úti öflugu æskulýðsstarfi 
Hér koma nokkrar myndir frá því Ungdómhópurinn gisti í safnaðarheimilinu í vor, mikið fjör og gaman.

Messa kl.11 á mæðradaginn 11 maí. Séra Hjálmar prédikar og þjónar fyrir altari. Dómkórinn syngur undir stjórn Kára Þormar organista. Síðasta samveran í barnastarfinu á þessu vori. Það er líf og fjör í barnastarfinu hjá þeim Óla Jóni og Sigga Jóni. Hjartanlega velkomin

Loksins, loksins er komið að samveru á fimmtudegi, eftir alla fimmtudagsfrídagana. Hlökkum til að sjá ykkur í dag í Lækjargötunni. Opna húsið er frá 13:30-15:30. Gott með kaffinu eins og alltaf.

Það iðar allt af lífi hér í miðbænum á þessum sólríka degi, garðyrkjumenn borgarinnar keppast við að snyrta og fegra Mæðragarðinn, því mæðradagurinn er á sunnudaginn. Mæðragarðurinn er austan við safnaðarheimili Dómkirkjunnar. Hann var gerður árið 1925 og styttan Móðurást eftir Nínu Sæmundsson var sett upp í garðinum árið 1928. Séra Hjálmar prédikar í Dómkirkjunni á mæðradaginn og lokasamveran í barnastarfinu á þessu vori verður þá. Tilvalið að mæta í messu með börn/barnabörn og koma síðan við í Mæðragarðinum og skoða styttuna Móðurást.

Bæna-og kyrrðarstund í kirkjunni í dag kl. 12:10. Veitingar í safnaðarheimilunu á eftir. Hjartanlega velkomin á þessa góðu stund.

Aðalsafnaðarfundur verður haldinn fimmtudaginn 15. maí 2014  í safnaðarheimili Dómkirkjunnar, Lækjargötu 14a og hefst kl. 17:15. Fundarefni: Venjuleg aðalfundarstörf Önnur mál.

Það var skemmtilegt að fá Helga Skúla Kjartansson sagnfræðing til okkar á prjónakvöldið, hann fræddi okkur um gömlu Reykjavík m.a. gamla kirkjugarðinn við Aðalstræti, ætla má að jarðneskar leifar 30 kynslóða hvíli þar. Mikil saga og fróðleg og var gaman að fara aftur í tímann eina kvöldstund og gera sér í hugarlund hvernig lífið hefur verið hér í Kvosinni á liðnum öldum.

Í kvöld verður Mission Impossible í Ungdóm. Leikurinn er fjörug útgáfa af ratleik, þar sem allt snýst um að fá stig fyrir að leysa miserfið verkefni. Herlegheitin hefjast kl. 19:30 og lýkur dagskrá kl. 21:00. Von er á smávegis rigningu en við munum ekki láta það stoppa okkur. Vonumst til að sjá sem flesta unglinga!
Kveðja frá Sigga Jóni og Óla Jóni.