Í dag voru tveir prestar og einn djákni vígð til helgrar þjónustu. Vígslan fór fram við hátíðlega messu.
Hinar nývígðu eru sr. Elísa Mjöll Sigurðardóttir, sr. Margrét Rut Valdimarsdóttir og Eva Lín Traustadóttir. Þær munu þjóna á Hólmavík, á Skagaströnd og í Hafnarfirði.
Vígsluvottar voru: sr. Sveinn Valgeirsson, sr Magnús Erlingsson.
sr. Sigríður Óladóttir, sr. Arnór Bjarki Blomsterberg, Vilborg Ólöf Sigurðardóttir, sr. Sigríður Gunnarsdóttir og sr. Sunna Dóra Möller.

Laufey Böðvarsdóttir, 24/8 2025
Biskup Íslands Guðrún Karls Helgudóttir vígir, séra Sveinn Valgeirsson þjónar fyrir altari og Matthías Harðarson dómorganisti. Verið velkomin!
Laufey Böðvarsdóttir, 20/8 2025
Fermingarbörn næsta vors og foreldrar þeirra eru sérstaklega boðin velkomin til guðþjónustu 7. september kl. 11.00.
Í framhaldinu verður kynningarfundur um fermingarstarf vetrarins. Prestar Dómkirkjunnar eru í samstarfi við Hallgrímssöfnuð um fermingarstarf og er fyrirhugað að börnin fari í fermingarferðalag í Skálholtsbúðir helgina 3-5. október n.k.
Hlökkum til samstarfsins í vetur!
Sveinn Valgeirsson
Elínborg Sturludóttir
Laufey Böðvarsdóttir, 19/8 2025
Dæmalausi dómkórinn syngur í Menningarhúsinu Bergi 16.ágúst kl 15. Verið öll velkomin!
Næstkomandi laugardag heldur hinn dæmalausi dómkór opna æfingu í Bergi og býður ykkur öll hjartanlega velkomin! Fjölbreytt dagskrá og enginn aðgangseyrir!
Á æfingunni syngur kórinn Guði, náttúrunni, Grýlu og samfélagi manna dýrð. Á meðal ljóða- og lagahöfunda eru okkar fallni félagi Leifur Hauksson, okkar spelllifandi félagi Hjörleifur Hjartarson og svo einhverjir minni en ef til vill enn þekktari spámenn.
Kórinn skipa vinir sem sungu í kirkjunni við Austurvöll á þeim tíma sem Martein H. Friðriksson var þar dómorganisti, á árunum 1980 til 2010. Þess vegna kallar hópurinn sig líka stundum Sönghópinn Martein. Æfingar eru óreglulegar en best sóttar ef þeim fylgir partý, sérstaklega af Svarfdælingunum í hópnum.
Hópurinn hefur sungið víða síðustu ár; í Bjarnarfirði á Ströndum, Barcelona og Breiðholtskirkju, á Skógum, í Vestamannaeyjum og Kópavogi og leið eins og á heimavelli í Heilsustofnuninni í Hveragerði og á Tenerife.
Þrír meðlimir kórsins hafa leitt æfingar kórsins í gegnum tíðina og leitast við að hafa stjórn á honum við opinber tækifæri. Upp á síðkastið eru það tenórinn Sigmundur Sigurðsson, að öðru leyti mjólkurbílstjóri á Suðurlandi, og sópraninn Kristín Valsdóttir, sem annars er prófessor við listkennsludeild Listaháskóla Íslands. Þriðji stjórnandinn hefur síðan verið Þórunn Björnsdóttir, landsfrægur kórstjóri úr Kópavogi, en hún gat ekki slegist í för í þetta sinn.
Dæmalaus dómkór á Dalvík, verið öll velkomin í Berg þann 16. ágúst n.k. kl. 15.
Laufey Böðvarsdóttir, 15/8 2025