Séra Þorvaldur Karl Helgason kemur í Opna húsið og les úr ævisögu Karl Sigurbjörnssonar biskups. Karl skildi eftir sig handrit að sjálfsævisögu þegar hann lést í febrúar árið 2024. Þar lýsir hann uppvexti sínum og daglegu lífi í Reykjavík um miðja síðustu öld, segir frá litríkum persónum, skólagöngu, áhrifavöldum, prestsárum og fjallar sömuleiðis um erfið mál á biskupsstóli og dregur ekkert undan. Bæna-og kyrrðarstund er klukkan 12.00 í kirkjunni. Upplagt að njóta þeirrar góðu stundar og koma síðan í safnaðarheimilið í veitingar, upplestur og gott samfélag.
Laufey Böðvarsdóttir, 19/11 2025
Guðþjónusta klukkan 11.00 í Dómkirkjunni á kristniboðsdaginn og á kirkjudegi Dómkirkjunnar, er var vígð 1796. Séra Sveinn Valgeirsson prédikar og þjónar fyrir altari. Matthías Harðarson dómorganisti og
Dómkórinn í Reykjavík leiðir safnaðarsönginn.
Verið hjartanlega velkomin til messu á sunnudaginn!
Laufey Böðvarsdóttir, 19/11 2025
Þorbjörg Sigríður Gunnlaugsdóttir, dómsmálaráðherra flytur hugleiðingu. Börn úr Landakotsskóla syngja nokkur lög undir stjórn Dagnýjar Arnalds. Séra Elínborg Sturludóttir, séra Sveinn Valgeirsson, Matthías Harðarson dómorganisti og Dómkórinn. Kirkjunefndarkonur Dómkirkjunnar bjóða í heitt súkkulaði, kaffi og smákökur í safnaðarheimilinu, Lækjargötu 14a. Verið hjartanlega velkomin og takið með ykkur gesti
Laufey Böðvarsdóttir, 19/11 2025
Laufey Böðvarsdóttir, 9/11 2025
Sveinn Þórarinsson amtskrifari á Möðruvöllum (1821-1868) hélt dagbók frá unglingsaldri þar til hann lést. Dagbókarfærslur, sem lúta á tónlist eru fjölmargar og mynda leiðarstef í heimildamyndinni „Frá ómi til hljóms, — tónlistin á dögum Sveins Þórarinssonar amtskrifara“. Hún fjallar um breytingarnar, sem urðu á íslensku tónlistarlífi á 19. öld. Tónlistariðkun Íslendinga hafði helst verið rímnasöngur, grallarasöngur, þulur og tvísöngslög. Annar fjölraddaður söngur þekktist ekki. Oft var sungið í fornum kirkjutóntegundum, svo sem lydíska skalanum. Einu hljóðfærin, sem almenningur hafði aðgang að, voru langspilið og íslenska fiðlan. Þá gerðist það fyrir miðja 19. öld, að ákveðið var að bæta þyrfti kirkjusönginn í Dómkirkjunni. Þær lagfæringar urðu upphafið á umsnúningi á íslensku tónlistarlífi, sem ruddi braut „hinum nýja söng“, en svo var hinn fjölradda söngur í dúr og moll kallaður, sem barst frá meginlandinu. Alþýðan tók þó líka frumkvæði, ekki síst á Norðurlandi á miðri öldinni; fiðlur og flautur voru keyptar inn og nótnahefti og fiðlueign almennings varð með eindæmum.
„Frá ómi til hljóms“ verður til sýninga í Bíó Paradís frá 4. nóvember.
Laufey Böðvarsdóttir, 1/11 2025
Laufey Böðvarsdóttir, 29/10 2025
