Hið íslenska Biblíufélags fagnaði 200 ára afmæli í gær, en það var stofnað í Reykjavík þann 10. júlí 1815 og er elsta starfandi félag landsins.
Hátíðarguðþjónusta var í Dómkirkjunni og messuformið var samkvæmt Handbók 1815.
Eftir guðþjónustuna var gengið út í Víkurkirkjugarð og lagður blómsveigur til minningar um Geir Vídalín, biskup en hann var fyrsti forseti félagsins
Dr. Gunnlaugur A. Jónsson, guðfræðiprófessor, flutti þar ávarp og sagði frá Geir Vídalín.
Næst var gengið að Aðalstræti 10 en í því húsi var Biblíufélagið stofnað. Þröstur Ólafsson, formaður Minjaverndar, hélt tölu og afhjúpaði látúnsskjöld ásamt biskupi Íslands, frú Agnesi M. Sigurðardóttur. Að lokum var afmælishóf í Biskupsgarði.

Laufey Böðvarsdóttir, 11/7 2015 kl. 12.53