Fallegur sunnudagur í Kvosinni í dag og við fögnum sumarkomunni. Góð messa eins og alla sunnudaga. Á morgun, mánudag er prjónakvöld kl. 19.00 í safnaðarheimilinu, þar mun Kristín Svanhildur félagi í Dómkórnum sýna fallegt handverk, sem hún vann m.a. í Hússtjórnarskólanum á Hallormsstað. Nokkrar konur standa að prjónakvöldunum mánaðarlega yfir vetrarmánuðina. Þetta eru notalegar og skemmtilegar samverustundir, sem styrkja vináttubönd og samfélagið í söfnuðinum. Konurnar selja létta máltíð, kaffi og sætmeti á vægu verði og gefa það sem safnast til fegrunar Dómkirkjunnar. Sjáumst í safnaðarheimilinu, Lækjargötu 14a. Á þriðjudaginn er bænastund í hádeginu, að þessu sinni verður hún í safnaðarheimilinu, léttur hádegisverður að henni lokinni. Athugið að þriðjudags Bachtónleikar falla niður 30.apríl en þá verða tónleikar í minningu Marteins dómorganista kl. 20.00 Þann 24. apríl hefði Marteinn H. Friðriksson orðið áttræður, en hann lést snemma árs 2010. Af því tilefni ætla fyrrverandi (og nokkrir einnig núverandi) Dómkórsfélagar og vinir Marteins að efna til kórtónleika í Dómkirkjunni. Stjórnendur eru Þórunn Björnsdóttir, ásamt tveim kórfélögum, Kristínu Valsdóttur og Sigmundi Sigurðarsyni. Og það verður ókeypis inn, eins og Marteinn vildi alltaf hafa það. Athugið pílagrímsgangan fellur niður 1. maí. Opna húsið fimmtudaginn 2. maí klukkan 13.00 Sögur úr æsku Laufásings. Þá fáum við góðan gest Tryggva Agnarsson lögfræðing, hann segir nokkrar sögur af sér og sínum, frá því þegar hann var patti úti í Þýskalandi. Ásta tekur á móti gestum með sinni glaðværð með klárt veilsuborð. Prestarnir gefa okkur góð orð og fara með ljóð dagsins. Fimmtudagsstarfinu lýkur svo með vorferð 9. maí. Þá ætlum við að fara austur fyrir fjall og heimsækja þau Ástu Kristrúnu og Valgeir Guðjónsson í Bakkastofu á Eyrarbakka. Tíðasöngur kl.16.45-17.00 alla fimmtudaga, sem séra Sveinn leiðir. Sálmar – Hymns Góð byrjun á helginni er að mæta á yndislega tónleika á föstudögum í Dómkirkjunni kl.17.00-17.30 Söngkonan Guðbjörg Hilmarsdóttir og organistinn Kári Þormar flytja sálma í Dómkirkjunni. Aðgangur ókeypis Verið hjartanlega velkomin í gott safnaðarstarf!
Laufey Böðvarsdóttir, 28/4 2019
