Við slökkviliðsmessu í Dómkirkjunni á morgun, sunnudag verður rifjuð upp samfylgd slökkviliðs og Dómkirkjunnar, sem minnist 220 ára vígsluafmælis um þessar mundir. Fyrstu áratugina var skrúðhús kirkjunnar jafnframt slökkvistöð bæjarins. En ekki aðeins að við séum með þessu að horfa um öxl, þó það sé mikilvægt til að staðsetja sig, átta sig í samtíð sinni. Sérhver stund í helgidóminum er vonartákn og framtíðarsýn, til þeirrar framtíðar sem Drottinn Kristur heitir og gefur.
Við messuna munu slökkviliðsmenn, sjúkraflutningafólk og bráðaliðar lesa texta og Dómkórinn mun syngja svonefnd Vaktaravers. Vaktararnir voru forverar lögreglu og brunavarða og gengu um göturnar og sungu á hverjum heilum tíma eitt vers af þessum vaktaravísum, eða sálmi, til að láta vita að allt væri með felldu auk þess að tilkynna hvað tímanum liði. Til dæmis þetta:
Alfaðir að oss gái,
ungum og gömlum hér,
eitt virki um oss slái,
engla blessaður her!
Hann er staðarins hlíf,
geymi vor hús,
Guðs son Jesús,
góss, anda, sál og líf
Laufey Böðvarsdóttir, 8/10 2016
Á fimmtudaginn kemur, 6. október munum við fara á fermingarbarnanámskeið í Vatnaskógi.
Rútan mun leggja af stað frá Dómkirkjunni kl. 15:30 og heimferð er áætluð um kl. 17:00 daginn eftir, þ.e. á föstudaginn. Gott er að vera komin(n) ekki seinna en 15:15 við skrúðhússdyr Dómkirkjunnar.
Þau börn sem eru í Hagaskóla þurfa ekki að fá sérstakt frí þar sem starfsdagur kennara er daginn eftir. Landakotsskóli er enn fremur búinn að gefa börnunun leyfi.
Þau börn sem eru öðrum skólum þurfa að fá leyfi hjá viðkomandi skólastjórnendum.
Gullna reglan:
“Allt sem þér viljið, að aðrir menn gjöri yður, það skuluð þér og þeim gjöra”
Ef einhverjar spurningar vakna þá endilega hafið samband við okkur.
Laufey Böðvarsdóttir, 5/10 2016
Dómkirkjan ætlar að efna til ,,Slökkviliðsmessu“ sunnudaginn 9. október nk. kl. 11:00.
Tilefnið er 220 ára afmæli kirkjunnar, en skrúðhús hennar (litla viðbyggingin) var fyrsta slökkvistöð Reykjavíkur og var þá nefnt „Sacristie- og Spröjtehus.“ Þessu hlutverki gegndi skrúðhúsið frá 1827-1886. Þegar Dómkirkjan var stækkuð 1848 og núverandi skrúðhús byggt, var slökkvitækjunum ætlað það rými, sem nú geymir snyrtingu og forstofu. Athafnasvæði presta og meðhjálpara var þar fyrir innan, eins og nú er, en dyr þangað voru á austurvegg byggingarinnar. Þórir Stephensen: Dómkirkjan í Reykjavík,II,bls. 209-210.
Af þessu tilefni er boðið til sérstakrar guðsþjónustu með þátttöku slökkviliðs- og sjúkraflutningamanna. Fulltrúar þeitta munu lesa texta við messuna og fluttar verða bænir og þakkargjörð fyrir slökkviliðs- og sjúkraflutningamenn og starf þeirra í þágu bæjarbúa. Karl Sigurbjörnsson predikar og þjónar fyrir altari. Dómkórinn og organisti er Kári Þormar. Gamlir slökkvibílar og búnaður verða til sýnis við kirkjuna og eftir messu býður Kirkjunefnd kvenna Dómkirkjunnar til messukaffis í Safnaðarheimilinu við Lækjargötu 14. Allir velkomnir.
Laufey Böðvarsdóttir, 3/10 2016